احبك من زغر سني ولهل حد
وحگ ما کفر بی گلبی وله الحد
لغيرك ماضحك سني ولا هل لحد
وعسى بلا موت نتلاحد سويه
****************************
يا كاس العمر ما ظلت وشل بيك
ويا جرحي لشوكت تنزف وشد بيك
يكلي ليش متمرمر وش البيك
وهو سبب كل الصار بيه
*****************************
يا شعر الحلوه من بللك من
و يا طعم الخد شبيه السلوى والمن
تريد الحق هن اللي يحكمن
وقوفاً يارجال اخذوا التحيه
*****************************
عندك ناس يعيشوا بلا هم
ووين ماتروح يصيبك بلاهم
وعندك ناس ماتسوى بلاهم
وعندك ناس ياريتك بلاهم
اصنام محركة وتلبس ثياب
*****************************
قلبي انت ملكته وانت حر بيه
عليل وطبي عندك وانت حر بيه
كاس السم اشربه وانتحر بيه
اذا غيرك يمس اطراف ادية
************************
يوم الأسود العرفتك بيه يا فلان
بعد قهر تعباك رديت نبلان ؟
شمالك يا زمن تجويني كل يوم
إذا برد جمرك تحرمني النوم
رمتني الدنيا سموم بسهام
بس تكعد فرحتي ترجع تنام
**************************
كلبي ما رغب بعدك و لا حب
و لا فكر بغيرك من رحت و لا حب
مريض انه ومااريد ابره و لا حب
بس شوفتك ترد الروح اليه
***************************************
بجت عيني على الخلان... من دم
و صار الصبر لي مشروب...من دم
لون ابجي عليك سنين.... من دم
ولا ساعة احب تبعد علية
***************************************
كل مغرم برت علته وناله
سعيد اللي حضه بشخصك و ناله
صديقي من سمع نوحي وناله
ترك شغله و بجة رحمه عليه
*************************************
تحية اخذ واشبكنك واحضنك
واضمك حيل على صدري واحضنك
اشمك مره ابوسك مرة و حضنك
واقدم الروح الك اجمل هدية
*****************************
لكط طرف الجديلة وحيل يرهه
وحجي الغالب على المغلوب يرهه
أنا روحي شعرة والمينون يرهه
لون عاقل يذب الصوج بية
*****************************
الدهر يا ناس بضلوعي ولابني
اخوي اللي ماحمل ضيمي ولا ابني
وعلاقة بعد ما اكون ولا ابني
لان كل اللي احبه يخون بيه
*********************
دموعي بيوم فقد الولف ليله
وردت عيني يمرها النوم ليله
تعيرني عجب بالشيب ليله
واخير ثنينا نشيب سوية
*********************
چذب حچيك أبد ما چنت جِدّي
لو خلصن سواليفك د جدّي
سوالف من زمن عمّي وجدّي
ولا تچذب إو تتفيّك عليّ
***********************
يدنية وياي بعد وبعد جدي
وعلي صيحي بعالي ألصوت جدي
هجمتي بيت أبوي وبيت جدي
وأنة إبلا بيت شتهدمين بيه
*******************
رجلي اعله القهر سيرن وجداي
لون لهيب الشوگ المزيد وجداي
انعل ابوي وعمي وخالي وجداي
لون ما يرضون يخطبوك اليه ..
***************************
هوايه من الحجي التحجيه بلعين
كافي من الكلت والكال بلعين
صديجي الما يحطني كحل بلعين
تنكره كل حواس الخمس بيه
***************************
سحرني إبعضّة شفافه وعينه
يربّي لو دعاك العبد عينه
مو دكتور بس فرّاش عَيْنه
يكنس كلمن إيزغلط عليّ
******************************
اذا صاحت كبار الحي والزغار
واذا من حبنا تجفي الناس وتغار
أطوگك طوگ من جوري ومن غار
وأخلّي الخلگ تسّودن عليّ
**********************************
زغار هواي لاموني والكْبار
لأن دومن وفي الْحبّك ولك بار
صُبَح گلبي إلك مسجد ولك بار
تصلّي إو تسكر او تلعب عليّ
****************************
طوكتني بالجوري وبالغار
زعل مني الورد والفل غار
وهاجمني الفراش والنحل غار
عليّ وخلص الرحيق ال بيا .......
****************************
گلب شامت إلك أسود... ولك عين
تصد للطايح بشدّة ..... ولك عِين
كافي من الجفا بسّك... ولك عِن
تراها الدنيا دوّارة إو رديّه
***************************
گلب صافي الك والله والك صاف
ومن الزمن ما البس المسمل والگصاف
ملعم الزمن انته والك صف
حطني بصفك اواعطف عليه ...
******************************
مو انته التقف لي ياشهم اني اقف لك
يالعمرك ما صحت بيه مثل غيرك قف لك
وانته الكنز واشلون يا كنزي اقفلك
اذا اقفلك اقفل الروح وافادي سوية
*******************************
ومعيط ...
گمت من الگلب يناس اجر وامعيط
وانه الچنت ذيب وخوش ذيب وامعيط
هسه صبحت للاسف بيد شعيط ومعيط
وحتى الخثي اتجاسر عليه
*****************************