بغداد -------------------

مدينته جميله و اسمها بغداد
عروس من السما للكاع مزفوفه
مثلها ما شفت والله بكل البلاد
طويله مضمّره و بالحسن ملفوفه
ينسّم بيهه دجله و ينثر الاوراد
و يكحّل جفنهه ابروجه جروفه
من البصره علمها و هم بعد تزداد
و ثقافتها اجت من جامع الكوفة
تنز بيها القوافي اتكول عدهه طراد
و ميزان الشعر ما اختلّت احروفه
يسموهه العرب يا زينه الامجاد
و مضيّف اليرحب دوم بضيوفه
كل ليل اليمرهه ياخذ شما راد
و كل جايع يمرهه ينترس جوفه
شكد حلوه بحلكهم كلمه الـ(لك داد)
اهلهه لو حجوها اتكول معزوفه
ما تنذل عنيده شما تجيهه اوغاد
ابو جعفر بناهه بلمسه اجفوفه
بيها الكاظم الينطي اليزوره امراد
و تحجي الناس كلهه ابطيب معروفه
سكتنه و انخرس ويانه حرف الضاد
و قضيتنه اصبحت للناس مكشوفه
ماتت و الضماير ما بعد تنعاد
و حضنا ويه العرب نامت عليه الطوفه
يا دار السلام و حسن جنّه عاد
و عيون المها ابغداد موصوفه
عيشه بهل زمان و هيج ما تنراد
وين الكاه مضدّج شرّع اسيوفه
يا وسفه عليهه انباعت بمازاد
جوهرة العرب و الشمس مكسوفه
مدينتنا عروسه و اسمها بغداد
عروس من السما للكاع مزفوفه

____