تعبني ابغرامك

تعبني بغرامك حيل.. ما اتعب
يالحته بصدودك ياترف تنحب

يابحر الحزن..يمعاشر الاسرار
شد اشما تريد وجور عالمركب

زيد بنار كلبي وما عليك اعتاب
شوكي يزيد بيه شما تصير اصعب

أنه وشعري صفينه ابحضرتك نسّاك
والعب بالقصايد كيف ما تلعب

شعري لغير شخصك ياترف ناكوط
وبكاسك يالاسمر صار ينصب صب

لاموني شكثر رادوني امل طرواك
غربان وصفت من كل كتر تنعب

وادريهم شماته وجلجلوا عالروح
واحجاياتهم سم كرصة العكرب

ناسك ياترف بيها اليحبك زور
من تضحك فرح عالنار يتكلب

ينخلهم زمانك يكشف المغشوش
ويصفّي الطبايع مثل فص الشب
* * *
تعبني بغرامك حيل ...ما اتعب
وابدم الجرح ياصاحبي اتخضّب

من نظرة هويتك واكبرت بحشاي
والشجرة العظيمة اتخضر من الحب

يابحر الحزن غركني موج الشوك
والغركان بخيوط الضوء يجلب

عذبني اعلى كيفك.. وابعد شما بيك
كلما زاد بُعدك.. حُبي سن ينظبّ

واكتبلك عهد ما اريد غيرك صاح
واحلف بالامام النال من مرحب

حبيتك صدك.. صبيت ماي الروح
بجفوفك يالاسمر من ردت تشرب

بس كونك تمر وتشوف حالي شلون
وتشوف الدليل شلون يتعذب

جا صبّن ادموعك عشرة عشرة ارداف
جي لنّك تشوف شلون حال الصَّب

واتأكد يالاسمر يا سليل الطيب
يخلص هالعمر والشوك ما ينضب